"Microsoft” компанияси "Windows 8.1” янги операцион тизими чиқарилгани ҳақида эълон қилди. 

Энди фойдаланувчилар "Пуск” тугмачасини излаб ўтирмайди.

Янги операцион тизим 2012 йил октябрида чиқарилган "Windows 8”нинг жиддий равишда янгиланган версияси ҳисобланади. Мазкур тизим "Internet Explorer 11” браузери билан етказиб берилади. У янги дастурларга эга ва "Windows” интерфейсига ўзгаришларни қўшиши мумкин. "Windows 8.1”нинг тизимли талаблари олдинги опреацион тизимникига мос келади. Компьютердаги барча параметрлар ва унда сақланаётган файллар 8 дан 8.1 га ўтганда ўзгариши ёки йўқолмаслиги керак.

Компания вакилларининг сўзларига кўра, компьютерларига Vista, Windows XP ёки Windows 7 операцион тизимларини ўрнатганлар учун янги тизим пуллик бўлади. Унинг нархи "Windows 8”никига тенглаштирилмоқда. Янги тизимни чакана савдо дўконларидан ва компаниянинг расмий сайтидан сотиб олиш мумкин.

Интернетдаги янги маҳсулотларни ўрганиш билан шуғулланувчи "NetMarketShare” тадқиқотчилик фирмаси экспертларининг айтишча, "Windows 8” операцион тизими чиққанига бир йил бўлганига қарамасдан, у бозорнинг бор-йўғи 8%ни эгаллаб турибди. Ушбу кўсаткич бўйича у "Apple”нинг  OS X тизимидан бироз олдинда (7%), аммо "Windows 7” (46,4%) ва "XP”дан (31,4%) сезиларли даражада ортда келмоқда.