 Марс сайёрасига бормоқчи бўлганлар бир нечта аъзоларининг баҳридан ўтишларига тўғри келади. Россия Тиббий-биологик муаммолар институти олими Вячеслав Шуршаковнинг айтишича, одам организми узоқ фазовий парвозларга мослашмаган, шунинг учун уни такомиллаштириш зарур. Унинг сўзларига кўра, одамзод Ер юзида шаклланган ва узоқ фазовий парвозларга тайёр эмас. Агар кимдир Марсга учишни хоҳласа, саёҳатдан олдин радиация энг кўп таъсир қиладиган тана аъзоларини сунъийларига алмаштириш керак. «Олиб ташланган тишлар ўрнига имплантатлар ўрнатилишини ҳаммамиз яхши биламиз, – дейди В.Шуршаков. – Худди шунга ўхшаб, келгусида сайёралараро саёҳатга отланган кишиларнинг кўзи ва мияси сунъийсига алмаштирилади». Олим юқори энергетик зарраларнинг фазовий сайёҳ кўз гавҳарини зарарлаши оқибатида катаракта келиб чиқишини айтади. Шунинг учун ҳам парвоздан олдин табиий кўз гавҳари ўрнига сунъийсини қўйиш керак. Мияда ҳам юқори энергетик зарралар зарарлаши мумкин бўлган қисм бор. Мазкур қисм фаолиятининг бузилиши Альцгеймер касаллигига йўл очади. «Оғир зарядланган зарраларнинг одам руҳияти ва жисмига таъсири ҳали ўрганилмаган. Тадқиқотлар ўтказиш учун каттагина маблағ керак», – дейди олим. Тахминларга кўра, Марсга илк парвоз 2030 йилда амалга оширилади.
|